Suudaanak Kalalí qandeh Saqalah yan Qabdulfattaac Al-Burhaan Sissik Qokolih qande Lowsiisit tabbixeh tan baaxooxak awqe waytek salaam wagsiisak Hebeltô walal akke waam yiysixxige.
********
Suudaanak Moddoqiinô malah buxah saqalaay Kalalí qande Saqalah yan Generaal Qabdulfattaac Al-Burhaan Kimaalih ayro Galli maroh eglah Saqalak baxsale Farmoytah yan Ramtaani Lamaarâ luk Walal gexsem qaddoosen.
Galli maroh eglah Saqalak baxsale Farmoytah yan Ramtaani Lamaara Suudaan doolatak elle sugah inaytah tan Porti Suudaan magaalat taamâ gufne abak Suudaanak Kalalí qandeh malaakâ luk walal gexseh yanim kee tama walalal Galli maroh egla Suudaanal Salaam geysiisoonuh macalak geytimaanam qaddoosem kee Geneeral Qabdulfattaac Al-Burhaan abeh yan yaabal suudaan doolat salaam yamaateemih fayxi leh tanim yiysixxige.
Takkay ikkah faxe Salaam walal qimbisaanamak afal Sissik qokolih qande Lowsiisseh tan dariifak inkih tawqem faxximtam kassiise.
