Suudaanak Kalalí qandeh Saqal Qabdulfattaac Al-Burhaan Miraacisah yan Qaskariyyoh doolat Ruusiyak baddí qande Afrikah caddol nabah tan baddí qandeh fanteena Suudaanal akah xissannah Ruusiyal essero xayyooseh tanim kee Ruusiyah doolat Tama Qaskariyyoh fanteenah Arac geytam baadak Tellemmô gitah yan Qasa badih Saacilih caagiida kattaattuuy, Kaxxa Istraateejî Saami teetih ginelem yescessen.
Suudaan kee Ruusiyah fanal Tama sittin gey yekkek Qasa bad kee Afrikah Gaysal Qaskariyyoh Fanteenaani Xissuh kaxxa macal abak geytimtah tan Ruusiyah doolatah kaxxa saami kinnim qaddoosen.
Tonnaah Ameerikah doolat Ruusiyaa kee Chaynah doolatitte Qasa badih Furdaadi(Marsoosa) Akah gee waan innaah kee Afrikah gaysal Qaskariyyoh Fanteenaani akah xise waan innah abak geytimtah tan macalitte teetik Baxaqak (Finqitak) geytimtam yescessen.
Suudaanak Kalalí qande miraacissah tan doolat Ruusiyal xayyoosseh tan esserol Ruusiyak baddi Qande 25 akah sugte Sittin gey akah aban innaah kee Tama Sittin gey Ruusiyah doolat 300 takke qaskar kee 4 takke kaxxam nabah tan Carbi markabitte Qasa bad fanal Rubtam tet xiqsiiselem qaddoosen.
Tonnaah Tama sittin geyiik ugutaka Ruusiyah Doolat Suudaanal Dahab kee Gersi maqaadinitte tayyaaqeemih saami geelem yescessen.
Ruusiyah doolat Qasa badak Porti Suudaan dariifaak Baadak 12% Tellemmoh uwwayti akak safartah tan Qasa badih gitaa kee Suwees Chanaalih gitte kattaattaamih saami geelem warsan.
Suudaanak kalalí qande miraacissah tan doolat Ruusiyak Qaran koositih silaacittee kee gersi silaacitte Addah tan limoh akah geytannah bicseloonum yescessen.
Suudaanak fayyo le caddoh miraac elle qaddoosennal Wall Street Journalah elle qaddoossennal Suudaan doolat Qusba Silaacitteh qokol faxxam takkay immay Suudaan doolat Ruusiyâ luk abtah tan xayna ameerikaa kee Awroppah inkittiinoh egla kaxxaam anqibelem qaddoose.
