Xaagu
Masrik Irô caagiidah malaak Badri Qabdulqaati Tatueh yan Sabatih Eretriyak Inaytâ magaala Asmarat Taamâ gufne abeh yanim kee Prezidanti Qabdulfattaac Al-Siisi Eretriyah Prezidantih Ruubeh yan farmo Prezidanti Isayyaas Afeworkil tabseh yanim kee Tonnaah Masrii kee Eretriya baxaabaxsa le caagiidal sittâ luk cattiimak Taamitoonuh sittin gey abeh yanim kassinna!
Tohuuk Ugutak Prezidanti Donad Trumpik Qarab baaxooxaa kee Afrikah geysak fayyo le caddoh fayu abeenah Yan Masqad Bawlos Masrik Irô caagiidah malaak Telefoonut Walaliseh yanim Timixxige.
Masrik Irô caagiidah malaak Dr Badri Qabdulqaati elle qaddoosennal Ameerikah Prezidantih Fayu abeenah yan Masqad bawlosû luk Telefoonut Walal gexseh yanim kee Tama Walal elle Kulsuk Sugem Fanti maacal tan Caalootaay, Suudaan bood kee Abbay (Naayil) weeqaytih Caagiidal Fidinuk walaleenim Qaddoose.
Baxsa luk Suudaan Caaloota wagsiisak Masrik Irô caagiidah malaak elle qaddoosennal Masri doolat Suudaan moddaqiinoo kee agat inkittiino akah dacarsimtannah faxximma inta Qokolitte abelem kee Tohuuk Iroh Suudaan Doolatih Saduh taamittah tan Exxaaxih mamaaxaga yaceenim faxxiime waytam Yescesse.
Tonnaah Carbit biyaakitteh tan sudaan ummattah banaadamiinoh qokolitte xayyoosoonuh Suudaanal elle sugah girâ soolo takkem faxximtaamih farmo tatrusem qaddoose.
Gersi gambil Masqad Bawlosû luk Abbay Karawwadaay, Ayrô mawqah afrikah Sabhalaal kee Qasa badih Amni (nagay aniina) wagittaam Fidin walal gexseenih yaniinim Ywscesse.
Itiyoopiyak Asqassaabê karawwada wagsiisak Masrik Irô caagiidah malaak Abeh yan yaabal Abbay weeqayti Masri Aniinâ caagid kinnim Ameerikah Prezidantih Fayu abeenah Qaddoosem kee Itiyoopiyah doolat Abbay Asqassaabê Karawwada wagsiisak Dubuh beyteh tan maaqatta masri doolat Qokole waytam kee Baad madqaa kee Baaxooxâ moddaqiino Yessakaxxeenim faxximtam Donald Trumpih fayu abeenah baxxaqisem Yiysixxige.
Masri fayyo caddoh miraaciini Erga Eretriyah abteh tan Taamâ gufne Ameerikah miraaciini kaxxa Hangi akah yeceeh geytimam kee Eretriyaa kee Masri doolatih fanal yekkeh yan walal kee angaaraw Ameerikah miraaciini maqar le hangi akah ucuyya heeh kattaatak geytimam Duggoose.
