Suudaan Kalalí qandeh Saqalah Qabdulfattaac Al-Burhaan kay Doolat Imaaraatâ luk walaltuh gulguluh geytimta axcuk Tawqeh tan oytitte dirabboosem Qaddoosen.****Suudaanak Moddaqiinô malah buxah Saqalaay Sudaanak kalalí qandeh Saqalah yan Genraal Qabdulfattaac Al-Burhaan Bacreen doolatih malakmisiinul Imaarat Qarabâ luk walaloonuh macal akkuk geytima axcuk Tawqeh tan oytitte Diraab kinnim Diggoose.
Suudaanak moddaqiinô malah buxak miixiyah exxa Teyyeeqeh tan maybalaalaqal Inteemih Generaal Qabdulfattaac Al-Burhaan Xayi Ayroorah addaa kee Irok Hebeltô miixiyaayil yeceeh yan maybalaalaqa Aalle waam Middle East Eye xaagih raceena Teyyeeqeh tan Oytitte diraabak tan oytitte kinnim tiysixxige.
Taturteh tan Ayroorah Suudaanal Uguteh yan addaa kee addah carbi sahhaloosoonuh Suudaan doolat kee Imaaraat fanal yanih yan kaxxa Kookaxaw Salaam gitaak Calli geysiisoonuh Bacreen doolat namma exxa bicissuh macalak geytimta axcuk Baxaabaxsa le Xaagih raceenaanil Oytitte awquk sugtem Kassinna.
Middle East Eye Diqsittah tan xaagih raceena Taturteh tan Ayroorah Teyyeeqeh tan oytittel Generaal Qabdulfattaac Al-Burhaan Suquudiyaay, Qummaan kee Bacreenit kee kalah tan Khaliij baaxooxat taamâ gufne abeh yanim kee Suudaan kee Imaaraat fanal Qusba angaarawitte ginoonuh akkuk geytimtah tan macalitte axcuk Oytitte teyyeeqeh sugtem warsan.
Tama Xaagih raceena Teyyeeqeh tan oytittel Suudaan doolat Imaaraatâ luk Qusba angaaraw gintuh Imaaraat Suudaanak Sissik Qokolih qandeh (RSF) abak geytimtah tan Qaskariyyoo kee Maaliyyah Qokolitte soolissam faxximtam kee Tonnaah Suudaanak Moddaqiinoo kee inkittiino akah tassakaxxennah Assenta (Sharti) daffeesak Sudaan Imaaraatâ luk walaltuh gulguluh tani axcuk Tama xaagih raceena Oytitte teyyeeqeh sugtem Yescessen.
Takkay ikkah Suudaanak Fayyo le miraaciini elle qaddoosennal Suudaan doolat Imaarat walal wagsiisak Tannah tan Mabla xayyoowe waytem qaddoosak Imaaraat doolat Chaadaay, Liibiyaa kee Itiyoopiyah gititteek Suudaanak Sissik Qokolih qande Qaskariyyoo kee Loojistiik Qokolitte abak geytimta axcuk Mango udduuruh Imaaraatak wayto xayyoosak Geytimaanam qaddoosen.
