Baad Xaagu
Ameerikaa kee Iraan fanal Girâ soolô sittin gey 60 Ayro fanah yayxeeroonuu kee Hormoz Gitaak Tellemmo maraakib abtah tan angagayyittet Gacteh sugteh tan Waaso (Hooro) Kaloonuh Xiqsiisah yan Qimbô caddoh Sittin gey fan gufeenih yaniinim Yescessen.
Tama Sittin gey baadak Tellemmô maraakib Hormoz gitaak Qagitaak Tangagayyuh kaxxa saami ginah yan sittin gey kinnim takkay immay Ameerikaa kee Iraan Nukleer Bicsih caagiidaa kee kalah tan ximmoomal Sittin gey abekkah yaniinim Qaddoosen.
Ameerikah Prezidantih yan Donald Trumpi Iraan kee ameerikah fanal Yekkeh yan Sittin gey wagsiisak Maybalaalaqa Ayyaaqekkah yanim kee Iraanak Doolat xaagih raceenaani elle tiysixxigennal walal Taham fanah akkuk geytimam kee Taham fanah Yekkeh yan sittin gey ane waam Tiysixxige.
Tama Diplomaasî caddol geytimteh tan xalootitte geytimteh tanim Tatureh yan ayyaamah Iraan kee Ameerikah fanal Qusba Qaskariyyoh booditte ginnimteh tan udduur kinnim Warsan.
Ameerikah doolatak Fayyo le miraac elle qaddoosennal Tatureh yan ayyaamah ameerikah qande Badal amni bohoyittee kee taqabitte tanim Tiysixxigeh tan udduur Ameerikak Qaran qande Iraan Diroonittet maysattaka abak qiddeh tanim Yiysixxige.
Iraan Uguugumiinih dacayrih qande elle tiysixxigennal Ameerikah Qande Maysattaka akah gexisseh tan Qaskariyyoh fanteenaanit Canê gacsi maysattakooki gexisseh tanim Tiysixxigem kassinna.
Iraan kee ameerikah fanal Diplomaasih angaarawitte meqe fooca baahak temeetem takkay immay Fanti maacal Uxih bohoyitte tanim Warsan.
Ameerikah doolat Tatureh khamiisih Iraanak Qaskariyyoh missoynaanî luk fantaaxaw lem akak dareemtah tan Siragleleê Tellemoh missoynal Katlâ xibix margaqa tatrusseh tanim Tiysixxige.
Tohuuk ugutak Baadal Siragleleê limo Osak ossam kee Baadak Siragleleê qadaaga Iraan kee Ameerikah Sittin gey fanaak finqitam bictah axcuk kaxxa bohoyih addat tanim kee Tohuuk gexxaamah Siragleleê limo Ayrook ayro Fayya axcuk geytimam warsan.
